آرتیق بیلگیلر اوچون بورایا باخین:
http://turkcemiz91.blogfa.com/
بو گونلر اونیوئرسیتهنین تئاتر ائوینده فرانسیزجا یازان اؤژن یونسکونون بیر اثرینی اوخویوردوق هامیسینی چئویرمهیه ده واختیم اولماسا ان چوخ سئودیییم بیر پارچاسینی تورک اوخوجولار اوچون چئویردیم. داز ییرچی( آوازخان طاس- Cantatrice chauve) مودئرن اینسانین هادارام پاداراملارینی صحنهیه چکیر. بو اینسان هاواسینا دانیشیر، اؤنمسیز دئتایلاری چوخ وورغو ایله دیله گتیریر آنجاق حیاتیندان بؤیوک آنلاملار ایتمیشدیرلر. بورادا موسوی مارتن ایله مادام مارتن بیر ار-آرواد اولاراق بیر ائوه قوناق گئدیر بیرینجی صحنه ده بئله دانیشماغا باشلاییرلار. یونئسکونون گؤزوندن مودئرن اینسان یاتاغینین اوستونه چکدییی ساتینین بویاسینی بیلیر اما ...
موسیو مارتین: چوخ چوخ باغیشلایین خانیم! اوزسوزلوک اولماسین آما، اما نظریمه گلیر من سیزی بیر یئرده گؤرموشم.
مادام مارتن:من ده آقا، منیم ده نظریمه گلیر سیزی بیر یئرده گؤرموشم.
موسیو مارتن: اولمایا منچسترده ایدی کی من گؤز آلتی باخیدم سیزه؟
مادام مارتن:چوخ امکانی وار. من منچسترلی ام. آما یاخشی حافظهم یوخدو. دئیه بیلمیرم حتمن منچسترده منه گؤز آلتی باخیبسیز یا یوخ.
موسیو مارتن: آمان آلـله! غریبه ایشدی! من ده منچسترلی ام خانیم.
مادام مارتن: غریبه ایشدی...
بوگون
دونیا اوشاق کیتابی گونودور. اوشاق ادبیاتیمیزین گلیشمهسینه چالیشان چوخلارینین
آدینی چکیب «ساغول» دئمک اولار آما من بوتون ساغوللاریمی اوچ نفره حصر ائدیرم:
اوشاق شاعیریمز بهرام اسدی جنابلاری، بیرنجی اوشاق ادبیاتی نشریاتینین(دنیزچین)
یارادانی معصومه اژدری و بیزیم خوخان سایتیمیزین یوکونو چکن اوختای نژاد
محمد.
باشیز اوجا اولسون!
بهرام اسدی جنابلارینین اوشاق کیتابلاری:
دده قورقوت داستان لاری( ساده دیلده)،گون چیخدی (اوشاق شعرلری)،یاغدی یاغیش لار (اوشاق شعری توپلوسو)، ال اله دویمه دله( اوشاق شعرلری)، حیوانلاری تانیاق( اوشاق شعرلری)
معصومه اژدرینین اوشاق کیتابلاری:
تاپ - تاپماجا،من باجارارام!، تاپ - رنگله (حيوانلار – قوشلار)، حيوانلار: (جوجولر، باليقلار، قوشلار)، حیوانلار(مئشه، داغ، چول، صحرا، دنيز، چاي و ائو حيوانلاري)، دونیا اوشاق ناغیللاری.
آیریجا بو سونکو کیتاب 1391 ده چیخان بیرنجی اوشاق کیتابیمیز اولدو و بونو دا قوتلاماق گرک.
یئر:تهران، بهشتی بیلی یوردو
چاغ: 1391/ اردیبهشت
اوزوموزه گلن ایلین ایکینجی آییندا بهشتی بیلییوردوندا چاغداش ادبیاتیمیز حاقدا بیر قورولتای کئچیریلجک. بو قورولتای اساس آماجی چاغداش اؤیکوسل ادبیات، اوشاق ادبیاتی و چئویری میزین پاتولوژیسیدیر. بو قورولتایا قاتیلماق ایستهین ادبیاتچی یولداشلاریمیزدان ایستهنیلیر فروردیننین سونونا کیمی چیخیشلارینین اؤزتینی قورولتایین یؤنتمنلیک قوروپونا گؤندرمکله آکادئمیک و بیلیمسل بیر اوتورومون کئچیریلمهسینده یؤنتمنلیک قروپونا یاردیمچی اولسونلار.
آرتیرمالییق، یؤنتمنلیک قروپو ارائه اولان مقالهلرین بیر توپلو بیچیمینده یایماسینی دوشونور.
قونولار:
چاغداش اؤیکوسل ادبیات
· سون ایللرده گلیشمهلر
· دیل آخساقلیقلاری
· یاپی آخساقلیقلاری
· فارس و تورکیه ادبیاتیندان ائتگیلندییمیز
· ادبی سوننتیمیزین ائتگیسی
· چیخار یوللاریمیز
· سون ایللرده باسیلمیش اؤیکولرین اوخونوش و آراشدیرماسی
اوشاق ادبیاتی
· سون ایللرده چیخان اوشاق کیتابلارینین آراشدیرماسی
· مئدیا اثرلر
· اوشاق دیلی و کاراکتئرلر
چئویری
· فارس و تورکیه ادبیاتیندان چئویرمک نهقدر گرکلی اولابیلر؟
· سون ایللرده اولان چئویریلره بیر باخیش
· چئویرینین ادبی دیسکورسوموزون گلیشمهسینده اولان رولو
· ادبیاتیمیزین بو دوروموندا نقدر اورژینال متنه صادیق قالماق اولار؟
آرتیق بیلگی اوچون بو دوشرگهیه باخابیلرسیز:
فورمو بورادان اندیره بیلرسیز.
سؤزون سونوندا مهندیس توحید سولئیمانی جنابلارینا یورولماسین دئییب باشلادیقلاری بو بؤیوک ایشده اونلارا باشاریلار آرزولاییرام.
